1Th 3 | KYG | STEP | Lapakae'e'mo o'mai'nona'mofe'mo laipamo'mo kana hu'nigeta lagesamo afitae'mo mago'e huta afa'a o'maigune. Mani Atenisi taonifi'mo mai'neta'ae'mo

1 Thessalonians 3

1 Lapakae'e'mo o'mai'nona'mofe'mo laipamo'mo kana hu'nigeta lagesamo afitae'mo mago'e huta afa'a o'maigune. Mani Atenisi taonifi'mo mai'neta'ae'mo 2 Timoti'mo alita'a atesu'ageno uno lapakegaiye, huta'a hu'no'ae. Agaemo lagae'e'mo magokepi lokaeno ali'ya'mo ne'alino Kalaisife'mo alagepa faigoko ge'amo aeno hakalo huno hapa nepaiya konagatimo'mo mai'niye. Lapa maeno alino lokiya vaino lapatesigetapa mago'e hutapa lapakesa afita fatago hisayafe'mo alita'a ate'no'ageno u'niye. 3 Fiku yanage'a kanamo ali'nona'mofe'mo mago vaya'mo asagau'a aigae. Lapakaemo ago afi'nayana Goti'a lagaefe'mo, ani kanamo afa'a aligae, huno agesamo afino hu male'niye. 4 Lapakae'e'mo hogoteta mai'netae'mo ina ge hutae'mo, kanamo aligune, huta lapa pai'nona agufa kanamo ali'nonageta ago lage'nae. 5 Ani kavafe'mo nahausoli hu'nige'nae'mo, mago'e hu'na afa'a o'maiguve, hu'na hute'na Timotife'mo, apakesa afi'a fatago nehafigi uka apako, hu'na ha pai'nove. Satani'mo apamalageka huteno ali'yatimo alino hano huno atale'nisifi, hu'na lusi kava hu'na koli hu'na ali'na ate'nogeno u'niye.

Timoti'a halate aino atagi neneno alagepa apava gemo laha pai'niye, huno hu'niya gemae

6 Hu'nova'monanafa Timoti'a lapakaetegati'mo halate aino atagi neno lagaetegamo eno'ae'mo alagepa lapava gemo laha paino'ae'mo, alagepa hu'a apakesa afi'a fatago nehu'a hapau apayamopafi'mo nehapaiye. Lagaemo apakesunafe'mo nehuna kava hu'a lagaefe'mo alagepa hu'a apakesamo ne'afi'a lagesayafe'mo nehae, huno laha pai'niye. 7 Konagatimogitapae, huta, kanamo alige lagafu kige huta mai'nonageno'ae'mo lapava gemo huno laha paino'ae'mo, alagepa hu'a apakesa afi'a fatago nehae, huno laha pai'niya gemo'a laipamo alino lokiya vaino late'nigeno laipamo'mo falu hu'niye. 8 Lapakaemo Ala kava nepi'mo mai'netapae'mo o'ataletapa atafautapa alagi huta mai'nisaya'mo'mo alagi alagepa huta ne'maune. 9 Goti aulagale'mo lamogaga aige aige huta mai'netae'mo lapakaetefe'mo lamogaga ne'auna kavatefe'mo alagepa huta Gotife'mo afa'a hao ke oseta haita ohapaigune. 10 Lagaemo uta lapa maeta lapakesa afita fatago hu'naya kavatapimo alita kosita atesunafe'mo muki afina'mo feluga'e hani'ilaga'e'mo laipafi'mo nunumu'mo huta nelapatone.

11 Afotimo Goti'e Ala kava netimo Yesu Kalaisi'e'mo uta lapakesuna ka'mo vali'ana latesa'ageta visunafe'mo lahau'niye. 12 Ala kava ne'mo'a lapa maesigetapa mago'e huno lusi kava huno lapau lapayamopafi'mo lapaino. Lagaemo lapakaefe'mo lahau layamopafi'mo lahau'niya kava huno konagatapimogi'e muki vaya'efe'mo lapau lapayamopafi'mo lapaino. 13 Ala kava ne'mo'a ani kavateti'mo lapa maeno lokiya vaino lapatenagetapa Ala kava netimo Yesu Kalaisi'e muki vaya'amogi'e'mo eminesiya afina'mo Afotimo Goti aulagale'mo hosu kavatapimo ohanesigetapa alagi alagepa hutapa maigae.